إزاي تبدأي تستخدمي التوكيدات؟

إزاي تبدأي تستخدمي التوكيدات؟ (من غير فزلكة)

بص يا معلم، التوكيدات مش محتاجة منك تكوني قاعدة على سجادة، ولا تقفلي النور وتشغلي شموع،
ولا تنامي بدري وتصحي بدري، هي ببساطة كلام إيجابي بتحطيه في ودانٍك بدل الهري اللي بتسمعيه كل يوم.

1. شغليها في ودانك في أي وقت
في الشغل؟ شغال.
في المواصلات؟ تمام.
بتتمشى؟ حلو. مش لازم وقت معين، ولا وضع معين.
إنتي حر. افتحي التوكيدات وشغليها كأنك بتسمعي مزيكا وخلاص. الهيدفون على ودنك والدنيا تمام.

2. كل ما تسمعي أكتر، هتحفظي
ده الطبيعي. من كتر التكرار هتلاقي نفسك بتقولي معاهم وانتي مش واخده بالك.
وبعد شوية هتلاقي الكلام ده بيطلع منك لوحده في مواقف الحياة. ده معناه إن التوكيد اشتغل ودخل في دماغك.

3. مفيش “طريقة صح” ومفيش “لازم”
عارفه لما كنتي بتسمعي أغاني حزينة وسلبية، وبتلاقي حياتك ماشية في نفس السكة؟
ولا كنتي بتقعدي تتأملي، ولا تولّعي شمعة، ولا تقعدي تقولي “أنا مكتئبة” بصوت رخيم قدام المراية!
انتي كنتي بتسمعي، وتتفرجي على المسلسل، وتعيشي، وتحسي، وتتعكنني… وخلاص.
من غير ما تحاولي، الأغاني كانتي بتدخل جواكي، وتبرمجك، وتعلّم عليكي.

نفس الحكاية هنا… التوكيدات مش محتاجة منك أكتر من إنك تسمحي لها تدخل.
مفيش “طريقة صح” ومفيش “لازم”. مش لازم تبقى مؤمنه أوي، ولا تحسي بحاجة من أول مرة، ولا تقوليها بصوت عالي، ولا تقفي قدام مراية عاملة زي فيلم أجنبي.

اعمليها بطريقتك، وبمزاجك. إنتي في الشغل؟ حطي السماعة، وخليها تشتغل ورا دماغك. ماشيه في الشارع؟ شغّليها وامشي. قاعده ساكته؟ قوليها في سرك. المهم تدي لنفسك الفرصة. تفتحي الباب للكلام الحلو ده يدخل جواك، يغير فكرة، يعدّل شعور، يوسّع الوعي… وحدة وحدة.

وصدقي… التغيير بيبدأ من لحظة بسيطة زي دي. من إنك تقولي لنفسك:
“أنا أستاهل حياة أحسن، وفعلاً… أنا جاهزة ليها.”

4. مفيش وقت محدد للنتايج
هي مش سحر، ومش في خلال 3 أيام الجسم هيتغير، بس لو استمريتي عليها، هتلاحظي إن في حاجات بدأت تتغير. مش دايمًا بنحس بيها بسرعة، بس لما تراجع نفسك بعد كام أسبوع هتقولي: “الله، انا اكلى بقى مختلف مثلا، أو بقيت أفكر بشكل تاني”.

5. خليك طبيعي
أنتي مش داخله سباق. التوكيدات مش فرض ولا عبادة. دي زي مية بترشيها على زرعة كل يوم، وبتكبر براحتها. استمتعي بيها، خليكي مرتاحه، وشغلي اللي يريحك وعيشي حياتك.

خلاصة الموضوع
إسمعي، كرري، واستمتعي. ومفيش حاجة اسمها طريقة مثالية. الطريقة الصح هي اللي تريحك وتخليكي تكمل.