وعيك يجذب كل شيء… حتى النمل

🌟 مش مطلوب منك تكون جريء… المطلوب بس تكون صادق مع خوفك، وهتشوفه بيتحول لحكمة.

🟡 تقنية التفريغ – الحرية من الخوف تبدأ من الاعتراف

الخوف مش دايمًا بيبقى منطقي
ساعات بيكون جاي من حاجة قديمة…
من موقف حصل وإنت طفل
من فيلم شفته وخوّفك
من حد خوّفك من غير ما يقصد

عشان كده بنستخدم "تقنية التفريغ" – علشان نفضي الخوف من جوه، مش نهرب منه

📝 الخطوات:

🌀 1. اعزل نفسك في مكان هادي

خد وقتك، اقفل تليفونك، وخلّي لحظتك دي كلها لنفسك

💭 2. ابدأ تكتب كل اللي بتحس بيه بصدق

– "أنا بخاف جدًا من كذا…"
– "بحس إني ضعيف قدامه…"
– "أنا مش فاهم ليه بيحصل كده بس بيوجعني"
اكتب بدون فلترة… حتى لو الكلام مش منطقي

😤 3. اسمح لنفسك تحس

لو عايز تعيط؟ اعيط
لو عايز تتنفس بعمق؟ تنفّس
لو حسيت إن جسمك بيهتز أو بيطلع طاقة؟ سيبها تطلع
المفتاح هو السماح

🔁 4. كرر

كل ما يطلعلك خوف تاني، أو نفس الخوف يرجع، كرر العملية
كل مرة بتقرب أكتر من التحرر الكامل

✨ 5. بعد التفريغ – تأكيدات إيجابية

اختار تأكيدات تربطك بالأمان:

"أنا آمن الآن"
"أنا أكبر من خوفي"
"أنا بطاقتي الجديدة بتعامل مع الدنيا بحب وسلام"

🧠 فايدة التقنية:

• بتخلي وعيك يعترف بالمشاعر المكبوتة

• بتسمح للطاقة القديمة تخرج

• بتفتح مساحة لنقطة وعي جديدة تدخل مكان الخوف

🔥 طيب بعد ما تكتب… تعمل إيه بالورقة؟

دلوقتي أنت كتبت مشاعرك، خوْفك، غضبك، قرفك هههههه ، وكل حاجة كانت محبوسة جواك.
الورقة دي مش مجرد ورقة… دي خدت طاقتك القديمة اللي إنت مش محتاجها تاني.

وعشان كده عندك كذا اختيار واعي:

🔥 1. تحرق الورقة

بطريقة آمنة، وتبص للنار وهي بتحول الخوف ده لرماد.
وقتها تقول:

"أنا بحرق خوفي القديم وبفتح لنفسي باب جديد من الشجاعة والسلام."

💧 2. تقطعها وترميها في المية

– ممكن تغمسها في مية لحد ما تدوب
– أو تسيب المية تشيلها في مجرى مية جارٍ (لو في نيل أو بحر)
وتقول:

"أنا بسيب خوفي يذوب في المية، والطبيعة تنظفه وتاخده مني."

🧻 3. تقطعها وترميها في الزبالة (وأنت واعي)

لو مش عندك مكان للحرق أو المية، كفاية إنك تقطعها بحب ووعي وتقول:

"أنا خلصت منها… ومش هرجع لها تاني."

✨ جُمل واعية ممكن تقولها وأنت بتتخلص من الورقة:

• 🌬 "أنا بسـمح لكل الطاقات السلبية اللي كانت جوايا إنها تتلاشى الآن بسلام."

• 🔥 "كل خوف وكل مقاومة بتتحرر مني دلوقتي… بسهولة ونعومة."

• 💧 "أنا بتحرر من كل المشاعر اللي مش بتخدمني… وقلبي بيختار السلام."

• 🌿 "أنا بفتح مساحة جديدة جوايا للراحة، للحب، وللأمان."

🕊 "أنا بختار إني أعيش من وعي جديد… من طاقة مختلفة."

🟡 لما طاقتي اتغيرت… المكان نفسه اتغير

فيه ناس بتتكلم كتير عن طاقة المكان:
المرايا ما تبقاش قدام السرير، الكرسي ما يبقاش فوش الباب، لازم زرع، لازم تبخير، لازم ترتيب…

بس أنا شفت الموضوع من زاوية تانية خالص…
أنا ما غيرتش اتجاه السرير…  ولا حركت ترابيزة…  ولا نظفت كراكيب اتجمعت من سنين…
ومع ذلك، المكان حواليّ اتغير بالكامل.

أنا شخصيًا قاعد في شقة… مش "فندق خمس نجوم".

الشقة فيها كركبة كتير…
أكياس بلاستيك متخزنة من سنين،
قصاصات ورق، كتب قديمة، حاجات كنت ناسي إنها موجودة.

بس رغم كل ده…  أنا حاسس براحة!  حقيقي براحة!

ليه؟
لأني غيرت طاقتي… مش غيرت ترتيب البيت.

بدأت أتعامل مع كل حاجة حواليا باحترام:
اتكلمت مع النمل، سبت البرص يمشي في حاله، حتى الذباب بطلت أطرده بعصبية…
والمكان، مع الوقت، بدأ يهدى.

بقيت بشكر كل حاجه حواليا

شكرًا للكرسي اللي شايلني
شكرًا للباب اللي بيحميني
شكرًا للشباك اللي بيخليني أشوف نور
شكرًا للنور… للهدوء… للحياة
شكرًا لكل تفصيلة حواليّا
حتى الحشرات… لو كانت جزء من التجربة… بشكرها.

افتح عينيك…  واسأل نفسك:

هل طاقة المكان اتغيرت؟
ولا أنا اللي اتغيرت… فبدأت أشوف المكان بشكل مختلف؟

بدات اشعر بطاقه المكان احسن واجمل واهدى وفيه راحه نفسيه.

❤️ الوعي مش ضد ترتيب المكان…

لكن الوعي بيبدأ من ترتيب طاقتك.

أنا غيرت نيتي… غيرت طريقتي في التعامل مع كل تفصيلة حواليا.
بدأت أشكر… أتكلم مع الحاجة بلطف…
ما بقيتش أقاوم…
ما بقيتش أكره الحاجات اللي كانت بتضايقني…
بقيت أدي أمان… حتى للحاجات اللي كنت بخاف منها.

حتى النمل…
حتى الحشرات…
حتى الكركبة.

حتى وإن ظهر شيء غير مرضي من جديد اسأل نفسي،

ايه اللى المفروض اتعلمه من الموقف او الشيء الجديد اللي رجع يظهر من تاني مثلا

وأبدأ اتعامل معاه من هذا الوعى.

كل حاجة بدأت تتعامل معايا بنفس طاقتي الجديدة.

الهدوء اللي كنت بدوّر عليه… طلع مش في ترتيب الأثاث، طلع جوايا.