استحقاق الرزق: إزاي تطلب من الكون وتكون جاهز تستقبل
هل أنت جاهز تستقبل الوفرة؟
“تخيل معايا كده…
إنت طلبت أوردر أكل من تطبيق، وجالك إشعار: الطلب جاي في الطريق.
بس انت… مشيت من البيت.
لما الدليفري يوصل… هيرن، هيستنى، ومفيش حد.
في الآخر؟ هيضطر يمشي.
مش لأن الطلب مش جالك… لأ، انت اللي مكنتش جاهز تستقبله.”
هو ده بالظبط اللي بيحصل لما تطلب فلوس من ربنا أو من الكون، وانت مش جاهز تستقبلها.
- تطلب وفرة، وانت جواك مش حاسس إنك تستحقها.
- تقول عايز أفلوس، وانت خايف تبان طمَّاع.
- تطلب رزق، وانت مش عامل أي خطوة تستقبله بيها.
كتير من الناس بتشتكي:
“أنا بطلب الفلوس، بعمل توكيدات، بصلي، بدعي، بجذب… بس مفيش حاجة بتتحرك!”
السؤال الحقيقي: هل إنت جاهز فعلًا تستقبل؟
١. إيه معنى إنك “مش جاهز”؟
لما تطلب فلوس أو وفرة أو رزق… الكون (أو ربنا سبحانه وتعالى) بيسمعك. الطلب بيوصل.
لكن السؤال: هل استقبالك متاح؟
زي ما يكون فيه شباك رزق مفتوح… بس انت قافل قلبك، قافل نيتك، قافل دماغك.
فيه ٣ حاجات رئيسية بتخليك مش مستعد:
1️⃣ أفكارك السلبية عن المال
- الفلوس وسخة
- الفلوس بتغير الناس
- الفلوس مش للناس اللي زينا
- أنا مش عايز أبقى طماع
- أنا لو غنيت الناس هتكرهني أو تحسدني
الأفكار دي موجودة جواك من وانت صغير: من أهلك، من المدرسة، من المجتمع.
طول ما العقل الباطن شايف إن الفلوس خطر أو عيب أو حرام، هيقف ضدك.
الحل:
ابدأ تلاحظ الأفكار اللي بتظهر في عقلك لما تيجي فرصة فيها رزق.
اكتبها، وابدأ تشكك فيها:
“هل الفلوس فعلًا وحشة؟ ولا الفلوس في يد إنسان طيب ممكن تعمل خير؟“
2️⃣ مش حاسس إنك تستحق
الاستحقاق مش كلام.
الاستحقاق شعور داخلي:
“أنا أستحق يكون عندي أكتر. أنا أستحق أعيش مرتاح. أنا أستحق النجاح.”
ناس كتير عندهم جواهم صوت بيقول:
- “أنا فاشل.”
- “أنا مش قد المسؤولية.”
- “أنا مش شاطر كفاية.”
- “أنا ما استاهلش.”
اللي بيطلب الفلوس وهو مش مصدق إنه يستحقها، بيطردها بدون ما يحس.
الحل:
ابدأ كل يوم تقول لنفسك:
“أنا أستحق الوفرة.
أنا أستحق الخير.
أنا أستحق النجاح.”
وقبل ما تقولها… اقعد لحظة وحاول تحسها.
حتى لو ١٪ من جواك بيصدقها… خليك مستمر، واشتغل عليها.
3️⃣ غياب الخطوات العملية
واحدة من أكبر طرق رفض الرزق: إنك تطلب ومتعرفش هتعمل بيه إيه.
مثال:
- تطلب ١٠٠ ألف جنيه، طب هتصرفهم في إيه؟
- لو جالك مشروع، هل هتعرف تديره؟
- لو جاتلك وظيفة، هل هتبقى مستعد تشتغل وتتعلم؟
الفلوس محتاجة وعاء تستقر فيه.
لو الوعاء بتاعك مش جاهز، هتهرب منك، أو متوصلش أصلاً.
الحل:
ابدأ خطط كأن الفلوس جاية بكرة.
- اكتب خطة مالية بسيطة: لو جاتلك وفرة، هتعمل بيها إيه؟
- هل عندك حساب بنكي؟ محفظة إلكترونية؟
- هل عندك فكرة عن الاستثمار؟ عن التسويق؟
ابدأ تطور نفسك. افتح مكان للرزق.
خلاصة
مش كفاية تطلب.
لازم تبقى جاهز تستقبل.
لازم تفكك أفكارك السلبية.
ترفع استحقاقك.
وتجهز خطواتك.
الفلوس مش بعيدة… إنت بس محتاج تفتح الباب، وتنضف المدخل، وتحس إنك تستاهل.
توضيح مهم:
خطواتك العملية مش شرط أساسي علشان الرزق يوصلك.
الرزق من ربنا، وقدرته مش مرتبطة بخطتك ولا بتجهيزاتك.
لكن الخطوات دي:
- بتخليك “واعي” ومستعد تستقبله لما ييجي.
- بتخلي عندك وعاء تستقبل فيه.
- بتساعدك ما تضيعوش لما يظهر قدامك.
لو حسيت إن المقال ده لمس حاجة جواك، ده مجرد بداية.
لو عايز تغوص أعمق وتشتغل فعليًا على رفع استحقاقك للرزق، أنصحك تنضم لكورس “فن الوفرة”.
الكورس شامل، وفيه خطوات عملية وتمارين هتخليك تحس بالتغيير من أول أسبوع.
